Па падазрэнні ў карупцыі затрымалі першага намесніка старшыні Брэсцкага аблвыканкама Валянціна Зайчука. Інфармацыя пра гэта ў незалежных СМІ з’явілася яшчэ ў лютым. 14 чэрвеня на нарадзе з Саветам Міністраў яе пацвердзіў Аляксандр Лукашэнка.
Следства па справе чыноўніка ідзе ўжо паўгода. Паводле Лукашэнкі, Зайчуку інкрымінуецца «атрыманне ўзнагароджання ў якасці хабару на тысячы даляраў за спрыяльнае вырашэнне пытанняў, якія ўваходзілі ў ягоную кампетэнцыю».
— Зямельныя ўчасткі, вылучэнне грашовых сродкаў, перадача інфармацыі пра будаўнічыя аб’екты сельгаспрызначэння і гэтак далей. За спрыянне. Хто будзе адказваць за гэта? — спытаў Лукашэнка ў непасрэднага начальніка затрыманага — старшыні Брэсцкага аблвыканкама Юрыя Шулейкі.
— Таварыш прэзідэнт, я па гэтым пытанні вельмі шмат высноваў зрабіў, — адзначыў чыноўнік.
Нагадаем, незалежныя СМІ пра затрыманне Зайчука паведамілі яшчэ 21 лютага. Крэсла першага намесніка старшыні Брэсцкага аблвыканкама Валянцін Зайчук заняў 18 чэрвеня 2021 года. Гэтае яго прызначэнне (як і папярэднія) узгадніў Аляксандр Лукашэнка.
Зайчук курыраваў пытанні аграпрамысловага комплексу і перапрацоўкі сельскагаспадарчай прадукцыі. Да прызначэння на высокую пасаду ў аблвыканкам ён быў кіраўніком Камянецкага раёна. Туды чыноўнік перасеў з крэсла першага намесніка старшыні Камітэта па сельскай гаспадарцы і харчаванні Брэсцкага аблвыканкама. Раней Зайчук працаваў у Маларыцкім райвыканкаме.
Чытайце таксама
