З 1 чэрвеня згодна з указам Аляксандра Лукашэнкі планавалася павышэнне тарыфаў на некаторыя жыллёва-камунальныя паслугі. Пра падаражэнне ЖКП паведамлялі ў тым ліку камунальнікі і дзяржмедыя. Аднак у МАРГ у пачатку чэрвеня заяўлялі, што рашэнне пра павышэнне тарыфаў яшчэ не прынятае. Журналіст «Люстэрка» як платнік за ЖКП патэлефанаваў у разлікова-даведкавыя цэнтры, каб спытаць, якія цяпер тарыфы. Здаецца, спецыялісты на месцах таксама не зусім разумеюць, што адбываецца.
На 1 чэрвеня пзгодна з указам Аляксандра Лукашэнкі было запланаванае павышэнне тарыфаў на некаторыя ЖКП. Да прыкладу, на ацяпленне і падагрэў вады — амаль на 25%. Аднак у пачатку чэрвеня ў МАРГ заяўлялі, што рашэнне яшчэ не прынятае. У Міністэрстве ЖКГ не былі ўпэўненыя, падымалі гэтыя тарыфы з чэрвеня ці не.
У гэты ж час на сайце Мінгарвыканкама можна знайсці нібыта павышаныя ў чэрвені тарыфы. Дакладна гэтак жа зрабіла і Гродзенская гарадская ЖКГ. Камянецкая ЖКГ таксама размясціла на сваім сайце павышаныя чэрвеньскія тарыфы за падагрэў вады і ацяпленне. І на партале камунальнай пісьменнасці ад Міністэрства ЖКГ ёсць абноўленыя з гэтага месяца тарыфы.
Журналіст «Люстэрка» патэлефанаваў у разлікова-даведкавыя цэнтры некалькіх гарадоў, каб удакладніць актуальныя тарыфы, па якіх будуць выстаўляць рахункі за чэрвень. На сайце РДЦ Кобрына размешчаныя старыя тарыфы. Па тэлефоне нам паведамілі, што пра новыя тарыфы на цеплазабяспечанне пакуль нічога не вядома.
— За травень нічога не змянілася, — з ходу ўдакладніла спецыялістка.
— Так, а за чэрвень? Была навіна, што павышаюць за чэрвень. Хацелася б даведацца, якія будуць тарыфы, — спытала нашая журналістка, якая патэлефанавала як мясцовая жыхарка.
— У нас яшчэ іх няма. Мы ж яшчэ чэрвень не закрываем. У ліпені будзе [вядома].
— Калі прыкладна будзе вядома?
— Дзесьці ў пачатку ліпеня набярыце.
Падобны дыялог адбыўся ў разлікова-даведкавым цэнтры Брэста. Туды мы звярнуліся таксама з пытаннем, дзе паглядзець актуальныя тарыфы з улікам павышэння за цеплазабяспечанне ў чэрвені. На сайце таксама размешчаныя тарыфы, уведзеныя са студзеня.
— Там [на сайце] - старыя, без чэрвеньскага [павышэння].
— А недзе можна паглядзець за чэрвень? — удакладніла журналістка.
— Яшчэ ў нас іх няма, яшчэ нічога не мянялі. У нас няма інфармацыі.
У Баранавічах спецыялісты, відаць, чакаюць павышэння, але пакуль не маюць дакладных звестак пра новыя тарыфы.
— Чэрвеньскія мы пакуль не размясцілі, іх пакуль няма, — ветліва адказала спецыялістка.
— А я правільна разумею, што па новых тарыфах будзе аплата ў ліпені? — удакладніла нашая журналістка як мясцовая жыхарка.
— Так, у ліпені за падагрэў вады будзеце плаціць за чэрвень па новай цане.
— Дзесьці можна паглядзець новыя тарыфы?
— Пакуль яшчэ іх не размяшчалі, нават нам не скідвалі. Сёння яшчэ толькі 14 чэрвеня, таму калі і будзе, то толькі бліжэй да канца чэрвеня.
Нагадаем, у апошнія гады ў Беларусі павышаюць тарыфы на ЖКП у два этапы — з 1 студзеня і з 1 чэрвеня. Улетку звычайна даражэюць гарачая вада, ацяпленне, электрычнасць пад абагрэў жылля. Паводле такой самай схеме ўвялі тарыфы і на 2024-ы. Адзінае адрозненне, што ўказ Аляксандра Лукашэнкі з’явіўся толькі ў пачатку лютага, то-бок ЖКП падаражэлі задняй датай — з 1 студзеня. Наступнае павышэнне было запланаванае на 1 чэрвеня, рост па асобных паслугах чакаўся адразу на 25%.
Напярэдадні чэрвеня пра падаражанне ЖКП паведамілі ў тым ліку дзяржвыданні (тут, тут і тут). Аднак профільныя ведамствы афіцыйна пра гэта нічога не распаўсюджвалі. Толькі 4 чэрвеня на званкі журналіста «Люстэрка» як спажыўца ў МАРГ і Міністэрстве ЖКГ заявілі, што павышэння за чэрвень не было. Але афіцыйныя дакументы, якія б адмянялі падаражэнне ЖКП праз указ Аляксандра Лукашэнкі, не былі апублікаваныя.
Нагадаем, у 2022 годзе быў прадугледжаны рост цэн на камунальныя паслугі з 1 чэрвеня, аднак урад постфактум адкруціў гэтае рашэнне.
Чытайце таксама
![Иллюстративный снимок. Фото: TUT.BY Иллюстративный снимок. Фото: TUT.BY](https://cdn-gtmimage.com/img/390x260c/zaglushki/0b/3/dengi_zhirovka_kommunalka_kommunalnye_platezhi_rubl_04.jpg)
![Изображение носит иллюстративный характер. Фото: zerkalo.io Изображение носит иллюстративный характер. Фото: zerkalo.io](https://cdn-gtmimage.com/img/390x260c/zaglushki/00/6/005_dengi_rubli_ekonomika_finansy_zarplata_16042024.jpg)
![В Минздраве рассказали о проблемах с лекарствами из-за санкций. Посмотрели, кто в основном поставлял их раньше В Минздраве рассказали о проблемах с лекарствами из-за санкций. Посмотрели, кто в основном поставлял их раньше](https://cdn-gtmimage.com/img/390x260c/0b/3/tabletki_lekarstva.png)