Прэзідэнт Украіны Уладзімір Зяленскі назваў прапанову Уладзіміра Пуціна пра спыненне вайны «ультыматумам» і параўнаў яго з тым, што казаў Гітлер пра Чэхаславакію.
— Што я магу сказаць? Гэтыя заявы — ультыматыўныя, яны нічым не адрозніваюцца ад іншых ультыматумаў, якія ён рабіў раней, — заявіў Зяленскі ў інтэрв'ю Sky TG24.
Украінскі прэзідэнт заявіў, што заявы Пуціна — «гэта адраджэнне нацызму. Гэта новая хваля гэтага нацызму, рускага нацызму», адзначыўшы, што Пуцін патрабуе аддаць яму ўкраінскія рэгіёны цалкам, а не толькі акупаваныя РФ часткі.
— Гэта тое самае, што зрабіў Гітлер, калі сказаў: «Дайце мне частку Чэхаславакіі, і ўсё скончыцца тут», — сказаў Зяленскі. — Але не, гэта хлусня, гістарычная хлусня.
Зяленскі заклікаў не верыць Пуціну, адзначыўшы, што раней ён казаў толькі пра Крым і Данбас, а цяпер ужо заяўляе пра чатыры рэгіёны.
— Яго не хвалюе, што адбываецца з людзьмі, гэта новы твар нацызму, — падкрэсліў Зяленскі.
«Расія баіцца сапраўднага міру»
Раней заяву Уладзіміра Пуціна пракаментаваў дарадца кіраўніка Офіса прэзідэнта Украіны Міхаіл Падаляк.
«Ніякіх новых „мірных прапановаў“ ад Расіі не паступала. Суб’ект Пуцін агучыў толькі „стандартны набор агрэсара“, які ўжо неаднаразова гучаў. Яго змест досыць спецыфічны, у найвышэйшай ступені абразлівы для міжнароднага права і абсалютна красамоўна сведчыць пра няздольнасць цяперашняга расійскага кіраўніцтва адэкватна ацэньваць рэаліі», — напісаў Падаляк у сацсетцы X.
Ва ўкраінскім МЗС адзначылі, што спроба Пуціна «выставіць сябе ў ролі міратворца», а таксама прапанаваць варыянты завяршэння распачатай ім вайны «абсурдная».
«Закідваючы такія сігналы ў інфармацыйную прастору напярэдадні правядзення інаўгурацыйнага Глабальнага саміту міру ў Швейцарыі, Пуцін мае толькі адну мэту: перашкодзіць удзелу лідараў і краін у гэтым саміце. З’яўленне заяваў Пуціна менавіта за дзень да пачатку саміту сведчыць пра тое, што Расія баіцца сапраўднага міру», — гаворыцца у заяве ўкраінскага замежнапалітычнага ведамства.