У Беларусі за ліпень вырасла афіцыйнае беспрацоўе. На пачатак жніўня непрацаўладкаваных налічвалася 5,3 тысячы, а за месяц да гэтага — 4,9 тысячы. Пра гэта паведамляе Мінпрацы. Пры гэтым афіцыйнае беспрацоўе ніжэйшае за фактычнае прыкладна ў 33 разы.
Афіцыйнае беспрацоўе сёлета было на піку ў пачатку красавіка — 5,9 тысячы чалавек. Пасля гэтага яно пачало зніжацца, а пазней — то расці, то трохі падаць. За ліпень гэты паказчык вырас прыкладна на 400 чалавек (з улікам акруглення).
Пры гэтым фактычнае беспрацоўе, якое разлічваецца паводле метадалогіі Міжнароднай арганізацыі працы, у Беларусі прыкметна вышэйшае за афіцыйнае. Так, фактычна беспрацоўнымі ў Беларусі ў першым квартале былі 176,3 тысячы чалавек. То-бок афіцыйнае беспрацоўе меншае за фактычнае прыкладна ў 33 разы (калі ўзяць звесткі па афіцыйным на 1 жніўня).
Наймальнікам на 1 жніўня патрабавалася 127,1 тысячы работнікаў (за месяц да гэтага — 123,7 тысячы). Гэта рэкордны паказчык. З агульнай колькасці вакансій, які былі адкрытыя на пачатак гэтага месяца, больш за 8 тыс. вакансій — з прадстаўленнем жылля, паведамляе Мінпрацы. «Попыт на работнікаў па прафесіях рабочых склаў 64,5% ад агульнай колькасці вакансій», — удакладняюць у ведамстве.
Сярод прычын, з якіх беларусы не рэгіструюцца ў цэнтрах занятасці, эксперты неаднаразова называлі нізкі памер дапамогі па беспрацоўі. У Мінпрацы неаднаразова анансавалі планы па павышэнні гэтых выплат, аднак гэта дагэтуль не зроблена.
Нагадаем, на пачатак траўня гэтага года ў Мінпрацы зафіксавалі антырэкорд па вакансіях з пачатку 2010 года і рост беспрацоўя.
Чытайце таксама
